فواحد نهار الإثنين كانت الشمس هايجة فالسما، والرواج نايض فدرب البراكيك
،اللي مشا يخدم مشا، والي عندو شي قرايا مشا ليها، واللي
شرات الخضرا شارتها، واللي نصبات لغدا راها نصباتو..اوا سيي نورمال ياهاد الناس
، راه الساعة قربات توصل التناش... وليني شي دار فداك لقنيت سراجمها باقي مسدودين
، لا حس لا نفس، مالكم كتخممو؟
شنو زعما فنظركم الناس مسافرين؟
ولا الدار مهجورة حيت مسكونة؟
ولا يكونو امٌاليها كل واحد خارج يقضي غارضو؟
والا. حتا حاجة من هاد الشي ماكاينة. وراه الناس باقيين مكمشين فالكاشات وعاطيينها لشخير
، ممسوقينش للدنيا. واييه؟ راها أسرة معروفة فالدرب وكلمتها متنزل للأرض
. اش كتقولو زعما؟
لاباس عليهم وشاريين الدنيا بفلوسهم؟
والاَ سيادنا هادي اسرة غير بسيطة وليني حداثية ومطورة مع راساتها. اجيو معايا خليونا نشوفو اش كاين فقعر الدار
. هاي هاي هاي هاي الدروج كلَُ ترابْ،ريحة الخموجية عاطية من الباب
، لعرارم ديال الكسوة مرمية فالارض
، الكوزينة معجنة و المواعن لاصقين بالوسخ ولا يدين اعتقوهم ،
التواليت مزبلة وكلشي فيها خاسر، ...ا
وا لتخلعوش راه هدا هو واقع أسرة شات شات، أسرة مغربية غارقة فعالم النت حتى لودنين
، حياتهم كلها عاشينها مع البيسي ديالهم.
اوا الله يستر وخلاص راه هكا غتكون الاسر المغربية منهنا لواحد خمس سنين ويلا بقينا على هاد الحالة.
اوا أجيو نتعرفو على أفراد هاد الاسرة الكريمة ، للا الضاوية والسي بوجمعة فبيتهم ناعسين عاطيينها لشخير
، أواحد للا مولاتي الساعة عيات متشطح وتغني وتقول واك واك اعباد الله راها 12 ولكن شكون سمعها ولا ساق ليها لخبار.
والدراري فين اهما؟
منى ومنير حتا هما باقي ناعسين
. بورتابل منى دايرا ليه اغنية هيفا بوسي الواوا ومجهدا ليه فالصوت
. وهو يصوني ،
نادت مخلوعة من النعاس، لقات صاحبتها مصيفتا ليها مساج"
علاش تغيبتي هاد الصباح؟
متنسايش لعشية عندنا الشفوي فالتاريخ."
منى دارت بيها الارض، كانت نسات القضية ديال الامتحان
، لوكان كتابي ساهل الحال ولكن شفوي اوا مصيبة هادي.
بدات كتخمم فشي كذبة:- أش نقوليه؟
علاش محفظتش ؟
غادي نقوليه الريزو مشا لي ههه ولا هادي قديمة...
اممم غنقوليه ماما دخل ليها الفيروس لبيسي ومرضات لا لا هادي بايخة ديجا قلتها ليه...
أممم لقيتها خويا ضرباتو صاحبتو بالمطرقة فالمسنجروطاح وديناه لسبيتار ههه ميتسالش لي هكا تتكون بنت للاّ الضاوية والا فلا
. اوا نرجع نكمل على نعاسي
.". أما واحد السي منير راه غارق فالاحلام مع صاحبتو الطليانية ،
مخلاَ روما تساراها ،
مخلاَ المكسيكْ، إوا حلمْ السي منير على راساتك راني
سامعة شي أخبار بلي الاحلام حتا هي غادي تتخوصص
وفي رواية أخرى سمعت بلي كاين شي قانون كيسمح بالتجسس على الاحلام غادي
يصادق عليه البرلمان اوا هاد المرة بقاو تحلمو في اطار مايسمى بالاحلام المرخص لها في الدستور.
على أي خليونا من هاد السياسة الخاوية.
منير باقي كيحلم ولكن بعدا هو راه مصلي لفجر ماشي بحال البقية كيصليو من الجمعة لجمعة
وشي مرات كيجمعو شهر ديال الصلاة.
مالكم فضوليين بزاف شميتو ريحة الالتزام زعما فمنير.
اوا هادشي خليوه للحلقات الجاية.
متنساوش موعدنا فالاسبوع الجاي باش نشوفو للا الضاوية والسي بوجمعة
ملي كينوضو من النعاس اش كيوقع فهاد الدار السعيدة.
الأحد نوفمبر 29, 2009 4:18 pm
