من تحمل مالا يطيقه سقط في ما يستحقه.

الحاجّة الحمداوية كانت كتغني فأيامها : الحولي بكرونو سايك الرونو, دابا إيلا دّارت فيرسيون جديدة لهاد الأغنية غادي يولي الحولي سايك كات كات, سيارة رباعية الدفع كيفما كيكولو صحاب الفصحى,وداير نضاضر كحلين وكيبخّ علينا فالسيغار, القضية غالية, وبالمقارنة مع جوج دريال اللي كيشدها الدريويش اللي كيعيّد كتولي القضية غالية بزاف, وإيلا شفنا شحال كيتكراطا ديال الضرائب ولكريديات من هاديك جوجدريال اللي كيشدّ الدريويش كتولي عملية شراء الحولي عملية انتحارية بجميع المقاييس, ولكن باش يعجبك الدّريويش ديالنا ماكايتزاكلش, أمعاهوم فالعيد, ويشري ليك الحولي واخّا يبقا غير بالكرسون, ولكن أشنو السباب ديال هاد الشي كولو؟ وعلاش الناس ميعيدوش بيخير ويبقاو لابسين حوايجهوم وتكون الأمور كلها بيخير وعلى خير؟
الشناقة هوما السبب هادي معروفة,واللي مامعروفش بزاف أنه كاين 3 أنواع ديال الشناقة: الصغار والمتوسطين ولكبار..
الشناقة الصّغار هوما هادوك اللي كيبانو غير من العيد للعيد و كيشنقو لحوالا, كيكونو العام كولو صباغة ولا نجارة و كيقلبوها شنيق نهار العيد لكبير, غير فالعيد مساكن, كيجيبو مثلا الحولي ب 30 ألف ريال و كيبيعوه ب 42 هي لقليلة..
الشناقة لمتوسطين هوما هادوك ديال لكريديات, كيبانو غير فالمناسبات, فينما تكون شي مناسبة تلقاهوم منوضين الرّصّة بالإشهارات, وهاد العيد راهوم مصدعين لينا راسنا فالتلفزة والراديو و طالين لينا كاع البانوات ديال الزناقي, هالحولي اللي نازل بالباراشيت, ها الحولي اللي محزّم و كيشطح, وفاللخر كيولي مول لكريدي اللي نازلة عليه الزلطة بلا باراشيت, وكيولي مسكين يشطح بلا هواه.

الحاصول, فاش خلاتها الحمداوية, واااا الحولي بكرونو.. واا سايك الرونو..اللاواه.. زّدي لاواه..